martes, 17 de abril de 2018

COÑECEMOS AO CAPITÁN NEMO!

Esta tarde, ao volver do recreo, decatámonos de que o proxector estaba encendido e que na pantalla dixital podíamos ver a imaxe dun señor descoñecido. Ademais, un conto que non coñecíamos aparecera tamén sobre o noso ordenador... Non entendíamos demasiado ben o que estaba ocorrendo, pero por suposto, todo isto tiña que ser obra do Señor do Tempo. Algo de razón tiñamos, mais desta vez tocou coñecer a unha nova personaxe. Aquí vos presentamos ao Capitán Nemo, o comandante do submarino Nautilus! O seu amigo o Señor do Tempo comentoulle que estabamos aprendendo máis sobre os tiburóns e as estrelas de mar, e o Capitán Nemo pediunos axuda para retomar tódalas anotacións que perdera cando o seu caderno desapareceu na profundidade do mar. Mirade, mirade!


Despois de analizar o vídeo e, por suposto, aceptar o reto proposto, coñecemos un pouquiño máis da historia deste capitán grazas ao conto que el mesmo nos deixou. Titúlase "20000 leguas baixo dos mares", foi escrito por Xulio Verne e aquí tedes ao noso encargado con esta historia tan incrible:


Ademais, aproveitamos para coñecer tódalas aportacións que realizaron algunhas compañeiras e algúns compañeiros ao noso proxecto:

Noa ensinounos un conto titulado "A vella quenlla perde os dentes", e ela mesma nos resumiu esta historia, na que a un tiburón lle caen tódolos dentes por morder unha pedra. Este queda moi fraquiño por non poder comer nadiña, pero por sorte o polbo créalle unha dentadura moi especial... Mañá leremos a historia completa, mais hoxe xa aprendemos que quenlla é sinónimo de tiburón!

Xabi compartiu con nós esta figura de tiburón, e grazas a ela descubrimos que a pesar de ter as mesmas partes que outros tiburóns que temos na aula, este ten unha apariencia diferente. Conta cunhas manchiñas na súa pel moi similares ás dun tigre, e é por iso que ao tiburón que nos trouxo o noso compañeiro lle chaman así: tiburón tigre!

Claudia presentounos ao seu tiburón de peluche, que durme na súa cama tódolos días! Tan pronto como o vimos, decatámonos de algo: fáltanlle as branquias! Ademais, tróuxonos un conto sobre a historia de Nemo (o peixe pallaso, non o capitán!), e que tamén leremos os próximos días, xa que lle estivemos botando un ollo e vimos que nel aparecían mil e unha especies de animais mariños!

Brais mostrounos un gran peixe de cores que trouxo da súa casa, acompañado dun conto titulado "¡Al agua!", que xa lemos e no que recoñecemos diferentes animais mariños!

Lucía trouxo unha pistola de auga con forma de tiburón que proximamente utilizaremos no patio, xa que se a empregamos na aula poñemos todo perdido. Grazas a esta figura descubrimos unha parte moi importante dos tiburóns: a aleta dorsal! Ademais, ensinounos unha variña máxica con forma de estrela que nos permitiu reflexionar sobre as cores das estrelas de mar. Nós só vimos estrelas de cor laranxa, mais tódolos Pondaliñ@s cremos que estas poden ser de moitas cores. Estaremos no certo? Seguro que moi pronto o descubrimos!

Igualmente, queremos anunciar que xa estamos completamente inmersos na temática deste novo proxecto. Se no anterior trimestre víamos pirámides por todas partes, durante os próximos meses seguro que atopamos animais mariños en calquera lugar. Hoxe sorprendeunos a nosa compañeira Noa ao berro de: "Profe, unha estrela de mar na miña galleta!". Por suposto, todos os Pondaliñ@s quixemos dar fe deste feito e achegámonos a observar a súa galleta!


Ademais, aproveitamos para presentarvos algúns dos xogos que estamos realizando despois das rutinas do encargado. Xunto aos que xa mencionamos noutras entradas deste blog, quremos mostrarvos algún que aínda non coñecedes! Esta mañá o encargado de poñelos en práctica foi o noso compañeiro Roi!


Comezou rexistrando o seu nome e a data no noso pequeno encerado. Continuou descompoñendo o día de hoxe, o número 17, para así seguir adentrándonos no mundo das decenas. Despois de manipular as pezas, agrupalas e realizar a suma, representou o número 17 no ábaco. Seguidamente, o noso compañeiro compuxo o seu nome co noso quebracabezas de letras, tanto en maiúscula como en minúscula, e representouno graficamente en minúscula, xa que proximamente así o rexistraremos en papel. A continuación, todos xuntos creamos o acróstico do nome do encargado, isto é, a partir das letras do seu nome creamos palabras novas. Como Roi só ten tres letras, decidimos facer isto un par de veces. Pensamos en palabras que comezasen polas letras correspondentes, escollemos a elixida e a partir dos seus sons compuxemos pouquiño a pouco as seis palabras de hoxe: rei, oso, iglú, rádula, ola e iguana. Ademais, coa axuda da profe "lemos" as palabras máis sinxelas. Por último, o noso compañeiro ordenou os números do 0 ao 20. 

Por suposto, tódolos Pondaliñ@s son diferentes, e aínda que todos realicen estas actividades, sempre as adaptaremos ao seu nivel de madurez, e eles e elas utilizan as estratexias que mellor se adapten ao que xa saben. Sen présa pero sen pausa!

Iso si, isto non foi todo o que realizamos no día de hoxe. Despois da actuación do noso encargado, era a quenda dos demais Pondaliñ@s! Esta mañá a profe tróuxonos un montón de animais mariños e, por suposto, xa quixemos estrealos. Así pois, cada Pondaliñ@escolleu o seu animal, deulle nome para desta maneira ampliar o noso vocabulario, e a profe pediunos que colocásemos o noso animal nun número en concreto. E así o fixemos!


E este foi o resultado final! Bravo por nós!



lunes, 16 de abril de 2018

CONTOS POR BICOS: VISÍTANOS A MAMÁ DE DANIELLA!

No día de hoxe continuamos cos "Contos por bicos" e na nosa biblioteca recibimos unha visita moi especial. Esta tarde estivo con nós Puri, a mamá da nosa compañeira Daniella.

Contounos a historia de "A cebra Camila", unha cebra que un bo día decide desobedecer á súa nai, e sae ao campo sen os seus calzóns e os seus tirantes. Sabedes que ocorre? Pois que o vento marchou coas súas raias! Dende ese momento a cebra emprende un camiño no que derrama sete bágoas, atopándose con sete animaliños que a axudarán a superar a súa pena regalándolle unha raia moi especial... Ademais, de volta a casa, a súa nai non lle riñe, entende que Camila se está facendo maior e non necesita daquela vestimenta axustada, mais o que sempre necesitará serán os consellos da súa mamá!


Ao rematar, como non podía ser doutra maneira, botamos un montón de foguetes para celebrar o moito que nos gustou esta historia. Por suposto, como agradecemento á mamá de Daniella, enchémola de bicos e achuchóns! Moitas grazas Puri, volve cando queiras!


Ademais, aproveitamos para comentarvos que xa estamos completamente inmersos no noso proxecto sobre os tiburóns e as estrelas de mar, e hoxe xa enviamos unha carta ás nosas familias para que nos boten unha man aportando distintos materiais á aula. Estamos desexando aprender máis e máis sobre estes animais! Aquí vos deixamos a carta que xa levou a nosa encargada de hoxe para a súa casa!


Iso si, algúns compañeiros aproveitaron a fin de semana para recompilar material incluso antes de escribir a carta. Mirade, mirade!


Alonso tróuxonos unha estrela de mar disecada que atopou a súa irmá Sabela na súa casa. Sabela visitou a nosa aula e explicounos que unha amiga da súa mamá a encontrara nunha rocha da praia e lla regalara ao noso compañeiro. Que útil nos será cando investiguemos sobre as partes do seu corpo! Polo momento observámola e tocámola: ten cinco brazos, buratiños, é distinta por enriba e por abaixo e é áspera. Seguro que moi pronto poderemos destacar outras características deste equinodermo!

Martina ensinounos unha estrela que creou coa súa mamá. A súa tiña seis brazos, e aí xurdiu a dúbida: Cantos brazos ten unha estrela de mar? Cinco ou seis? Pode ter máis? Pode ter menos? Xa temos algo sobre o que investigar!

Roi amosounos unha marioneta de tiburón que atopou esta fin de semana nunha tenda e que non se puido resistir a mercar. Desta vez observamos a cor do tiburón e xurdiron as primeiras dúbidas: Será un tiburón azul? Existen os tiburóns azuis? A algún Pondaliñ@ soáballe o nome pero non o podía afirmar ao cen por cen. Así que... Outra investigación en marcha! E así continuamos analizando as partes da súa cabeza: ollos, morro, boca, dentes... E que serían esas raias que víamos en ambos lados da súa faciana? Novas hipóteses xurdiron na aula: Son os oídos! Son os buraquiños polos que saen os sons que realizan! Son os buraquiños polos que respiran! Unha das tres hipóteses é correcta, pero para comprobalo necesitamos libros e/ou vídeos informativos que seguro que nos chegarán nos próximos días!

viernes, 13 de abril de 2018

CONCERTO DIDÁCTICO: "O CIRCO AMBULANTE"

O de hoxe foi un día diferente... Unha vez máis montamos no autobús para visitar a cidade da Coruña, nesta ocasión para asistir a un concerto didáctico moi circense!




Aquí nos tedes aos Pondaliñ@s de 3, 4 e 5 anos no Pazo da Ópera!


Despois de subir un montón de escaleiras, cada Pondaliñ@ situouse nunha das butacas esperando a que comezase o gran espectáculo!




E cando se apagaron as luces... comezou o espectáculo! Aquí vos deixamos un pequeno resumo do que vimos sobre o escenario! Cantamos, bailamos, coñecemos diferentes artistas de circo... E o máis importante, pasámolo estupendamente ben!


E para rematar a xornada, incluso sacamos unha fotografía cos protagonistas desta actuación!

FOI UN GRAN DÍA E PASÁMOLO XENIAL!

Ademais, aproveitamos para comentarvos que xa escollemos temática para o proxecto deste trimestre... Fai uns días que o Señor do Tempo nos deixou a súa derradeira carta, onde nos anunciaba que no próximo mes de maio visitaremos o Aquarium da Coruña. Por este motivo, agasallounos cun libro con gafas 3D onde se recollían moitos dos animaliños que veremos durante esta visita. Así pois, tiñamos unha nova misión: elexir sobre que queríamos aprender. Analizamos as páxinas dese libro, visitamos a web do Aquarium, vimos vídeos... Con toda a información, xa estabamos preparados para realizar a votación.

Comezamos propoñendo os animais dos que nos gustaría saber máis, e os escollidos polos Pondaliñ@s foron: Tiburóns - Peixes - Baleas - Golfiños - Estrelas de mar - Tartarugas - Cabaliños de mar - Polbos - Focas. Realizouse unha primeira votación e os gañadores absolutos foron os tiburóns (¡Estamos desexando coñecer a Gastón, o tiburón que vive no Aquarium!).


A profe decatouse de que a metade da aula votara os tiburóns, pero a outra metade escolleran outras opcións, así que tivo unha idea... Por que non aprendemos sobre dous animais mariños que nos gusten a tod@s? Descartamos as baleas, os golfiños e os polbos por non ter ningún voto (Os Pondaliñ@s que realizaron estas propostas logo decidiron que lles gustaba máis a opción dada por outro compañeiro). Seguimos ao noso, analizamos datos e vimos que, despois dos tiburóns, as dúas opcións máis votadas eran as estrelas e os cabaliños de mar, así que a decisión estaba naqueles Pondaliñ@s que votaran aos peixes, ás tartarugas e ás focas, que tiñan que modificar o seu voto e escoller que animal acompañaba aos tiburóns. E as elexidas foron as estrelas de mar! (Gustounos moito iso que léramos de que no Aquarium as poderíamos tocar). Falamos cos Pondaliñ@s que escolleran os cabaliños de mar e dixéronnos que as estrelas tamén lles gustaban moito, así que xa estaba todo decidido...


OS TIBURÓNS E AS ESTRELAS DE MAR SERÁ A TEMÁTICA DO NOSO NOVO PROXECTO!

martes, 10 de abril de 2018

CONTOS POR BICOS: VISÍTANOS O IRMÁN DE ROI!

No día de hoxe continuamos cos "Contos por bicos" e na nosa aula recibimos unha visita moi especial. Esta mañá estivo con nós Leo, o irmán maior do noso compañeiro Roi!

Contounos a historia de Marjorie, máis coñecida como "A vaca que puxo un ovo"! A nosa protagonista é unha vaquiña que quere facer algo diferente para destacar entre as demais vacas, que contaban con talentos moi dispares. A pobre Marjorie, triste e apenada, é axudada polas súas amigas as galiñas, as cales lle botan unha man con iso de poñer un ovo. Iso si, tan pronto como a noticia sae á luz e tódalas miradas se poñen sobre a nosa protagonista, as outras vacas, envexosas da popularidade de Marjorie, intentan demostrar que todo se trata dunha mentira. Mais o final desta historia deixou asombradas a tódalas personaxes deste conto, e a nós regalounos unhas sonoras gargalladas!


Ao rematar, como non podía ser doutra maneira, botamos un montón de foguetes para celebrar o moito que nos gustou esta historia. Por suposto, como agradecemento ao irmán de Roi, enchémolo de bicos e achuchóns! Moitas grazas Leo, volve cando queiras!


Ademais, aproveitamos para comentarvos un pouquiño do que fixemos a semana pasada. Xa que aínda que non subimos nada ao blog, temos algunha que outra novidade!

O mércores, mentres a mestra Rocío nos ía chamando para gravar a nosa parte do vídeo, quedamos na aula co profe Xalo, co que rematamos un novo quebracabezas do Antigo Exipto! Mirade, mirade!



O xoves aproveitamos para rematar uns traballiños que quedaran pendentes antes das vacacións, e o venres quixemos darlle a benvida á nova estación cuns debuxos moi especiais... 





Desta vez non tocaba debuxar nin colorear sobre folio, cartolina ou lenzo, senón que por primeira vez fixémolo sobre... SERVILLETAS! Si, si, o que escoitades... A profe non se volveu toliña, aínda que moitos o pensamos, senón que o que pretendía era favorecer a nosa concentración, regular a presión que exercemos co rotulador, desenvolver a nosa imaxinación e creatividade, etc., ao mesmo tempo que coñecíamos unha nova técnica artística: o puntillismo! Aproveitando os puntiños que tiñan as nosas servilletas, tiñamos como misión introducir esta técnica na nosa obra, e cada Pondaliñ@ escolleu de que maneira quería facelo. Iso si, algúns que primeiramente puntearon, decidiron que o seu debuxo quedaba moito mellor se o coloreaban, e así foi. Nalgunhas obras non queda nin rastro dos puntiños, ao fin e ao cabo, os artistas mandan nas súas obras!


E xa para rematar este resumo, anunciarvos tamén que no día de onte coñecemos unha nova integrante da familia real que goberna o noso País das Letras. Así pois, presentámosvos á princesa O!


Xa realizamos as primeiras actividades relacionadas co trazado desta letra, entre outras, unha das nosas favoritas: escribir no encerado da profe!

lunes, 9 de abril de 2018

QUE APRENDEMOS DO ANTIGO EXIPTO?

Durante os últimos días abandonamos un pouquiño o noso blog e non subimos ningunha actividade porque estabamos inmersos na última misión do Señor do Tempo... 

Estamos a piques de romper o feitizo que botou sobre a nosa escola, e a única maneira de facelo é demostrándolle todo o que aprendemos sobre o Antigo Exipto...

Xunto aos Pondaliñ@s de 3 e 5 anos creamos este vídeo onde uns preguntan e outros responden, e así resumimos todo o que descubrimos desta civilización dende o pasado mes de xaneiro.

Que opinades? Credes que lle gustará ao Señor do Tempo? Romperemos o conxuro? Esperemos que si... Oxalá recibamos boas noticias ben pronto!

martes, 3 de abril de 2018

ANIVERSARIOS DE MARZO!

No día de hoxe estivemos de celebración! Durante as últimas vacacións, a nosa compañeira Martina fíxose maior e cumpriu 5 anos! Aquí a tedes coa súa coroa e coa súa chapa conmemorativa no noso marco dos aniversarios!


Por suposto, tódolos Pondaliñ@s a felicitamos e aquí estamos con Teo, que tamén se quixo unir á nosa celebración! 


Xa nos nosos lugares, cantámoslle o "Cumpleaños feliz" mentres a nosa compañeira sopraba a súa vela de aniversario!


Despois disto, o que tocaba era encher as nosas barrigolas con esta espectacular tarta exipcia! Non lle faltaba ningún detalle e, ademais, estaba riquísima!


Iso si, os Pondaliñ@s non fomos os únicos invitados a esta celebración! Con Martina tamén quixeron compartir este momento Rafa e Álvaro, o papá e o padriño da nosa compañeira.


Moitos parabéns e a cumprir moitos máis! Agardamos que che gustasen os nosos agasallos!

viernes, 23 de marzo de 2018

FELICES VACACIÓNS!

O 2º trimestre deste curso xa rematou, e tódolos traballiños que fomos realizando durante estes meses están gardados nesta carpeta tan exipcia. Para crear a súa portada, a profe transformou aos Pondaliñ@s en monarcas exipcios, e xunto á nosa fotografía colocamos un cachiño do papiro que creamos días atrás, e no cal debuxamos un peixe... Sabedes por que o fixemos? Pois porque o peixe era o amuleto dos nenos e das nenas no Antigo Exipto! Por suposto, a nosa carpeta gardámola nunha bolsa, que nesta ocasión decoramos con tres coelliños de Pascua que fai uns días picamos! Gústavos? Agardamos que si! Aquí vos deixamos á nosa encargada de hoxe mostrando as nosas creacións!


E falando de coelliños de Pascua... Sabíades que o teléfono da profe ten poderes máxicos? Si, si, si... Mirade, mirade! As nenas e nenos de 4 anos tamén queremos desexarvos unhas felices vacacións con estas simpáticas fotografías que sacamos esta mesma tarde! 












E AGORA... A PASALO ESTUPENDAMENTE BEN DURANTE ESTES DÍAS DE DESCANSO! TOCA REPOÑER FORZAS PARA VOLVER O PRÓXIMO MARTES 3 DE ABRIL COAS PILAS SÚPER CARGADAS!